奇妙電視春茗晚宴
藝人聚首「撈起」慶新春
分享新節目大計 祝願開台順利
奇妙電視將於今年5月開台,揭開香港電視史上新一頁。奇妙電視台前幕後正密鑼緊鼓籌備,有線娛樂執行董事曾展章先生於昨晚率領一眾奇妙電視製作團隊及藝人舉行春茗,分享拍攝節目的感受,更齊齊食「撈起」,祝願奇妙電視開台順利,風生水起。

鵬哥唔只試咪? 趙海珠、林小珍請教演技
盧海鵬將率領趙海珠、林小珍及一眾奇妙電視藝人拍攝《放試》,以多個實驗測試香港人特質。鵬哥更將有破格演出,直撃的士台總部及拳賽試咪,實行搞搞震,「今次係一個新嘗試,從來未試過拍呢類節目,唔單只試咪,總之到時咩都試!」身旁的趙海珠、林小珍希望向鵬哥請教演技,務求喬裝騙過香港人成功測試,對此鵬哥笑稱:「駛咩演技?扮嘢最緊要自然!」

黎燕珊訪問眾多星級媽媽 曾美華私心搵學校
黎燕珊將參與全新節目《潮拜傲媽》,與曾美華一同探討「教仔經」,珊姐指:「我會訪問啲星級媽媽,分享教子奇招,例如陳美齡,其他嘉賓就賣下關子先!」為人媽媽的珊姐直言對子女最重要有愛,「我唔敢話自己做媽咪有幾出色,不過只要畀多啲愛啲小朋友,佢哋一定做得好。」正處於為子女選校階段的曾美華,將於節目考察香港各大名校的秘密,「我私心地諗住順便幫仔女睇埋,仲可以向珊姐偷師做媽媽心得,真係貼錢都要拍呢個節目!」

朱潔儀唔怕食肥 陳倩揚要仔仔做白老鼠
朱潔儀將首次擔任飲食節目主持,於餐桌上分享營商經驗,她自言事前做足準備,向不同主持偷師,亦不怕因此食肥,「我不嬲都好鍾意食嘢,但平時注重食療,生活習慣健康,所以應該唔怕。」同樣愛下廚的陳倩揚將主持《細細Love》,介紹小朋友四時飲食,「我已經袋住好多食譜,依家成日畀兩個仔仔試菜。節目每集會按不同題目介紹,簡單易明,相信每個家長都識做。」

Coffee為男友下跪解畫 邵仲衡期待與二汶合作
主持《吾男吾女》的林芊妤(Coffee)將在節目分享兩性關係,她個人的愛情生活亦備受關注,早前被拍得被男友當眾下跪,Coffee解釋:「我當晚發脾氣要走,點知佢竟然跪低,我即刻叫佢起身,因為佢飲醉酒啫,唔係求婚。」拍檔吳日言笑言要跟Coffee好好學習,「我同老公一鬧交就真鬧,仲點會好似佢哋咁耍花槍!」邵仲衡則夥拍林二汶拍攝《香港事…香港是…》,發掘香港不同的集體回憶,「我係土生土長的香港人,希望透過節目畀年青人了解香港值得保留嘅事。第一次同二汶合作,知道佢係一個好有想法嘅人,相信我哋都會有新火花。」